போர் நிறுத்த உடன்படிக்கையை சிறிலங்கா ஏன் முறிக்கிறது?

-எரிமலை-

சிறிலங்கா அமைச்சரவையில் ஏகமனதாக எடுக்கப்பட்ட போர் நிறுத்த உடன்படிக்கையில் இருந்து விலகுவது என்ற தீர்மானமானது சிறிலங்காவிற்கான நோர்வேத் தூதுவர் தூர காற்றமிற்கு இரவு 8.30 மணியளவில் அமைச்சரவையில் பங்குபற்றிய ஒருவரால் அறிவிக்கப்பட்டது. இச்செய்தியானது நோர்வே அபிவிருத்தி அமைச்சரும் பேச்சுவார்த்தைக்கான நோர்வே அனுசரணையாளர் குழுத்தலைவருமான எரிக் சொல்கெய்மிற்கு உடனடியாகவே அறிவிக்கப்பட்டது. புதன்கிழமை இரவு பல்வேறு சர்வதேச மற்றும் உள்நாட்டு ஊடகங்கள்; இந்த விடயத்தினை தலைப்புச் செய்தியாக வெளியிட்டிருந்தன.

சிறிலங்கா அமைச்சரவை இன்று மாலை நடாத்திய கூட்டத்தில் போர்நிறுத்த உடன்படிக்கையில் இருந்து விலகிக்கொள்ள முடிவெடுத்து விட்டதாகவும் இதனை உடன்படிக்கையின் சரத்துக்கு அமைய மற்றைய தரப்பிற்கு (விடுதலைப் புலிகளுக்கு) தெரிவிக்கவுள்ளதாகவும்| தேசிய பாதுகாப்பிற்கான ஊடக மைய இயக்குனர் லக்ஸ்மன் குலுகல்ல தெரிவித்தார். இச்சரத்தின்படி இந்த முடிவானது போர் நிறுத்த உடன்படிக்கையில் கைச்சாத்திட்ட மற்றைய தரப்பிற்கு அறிவிக்கப்பட்டு இரண்டு வாரகாலத்தில் இவ்வுடன்படிக்கை செயலற்றுப் போய்விடும்.

இந்த விடயத்தினை நோர்வேயின் சமாதானத்திற்கான விசேட தூதுவர் ஜோன் கான்சன் பௌயர் உத்தியோகபூர்வமாக விடுதலைப் புலிகளுக்கு புதன்கிழமை இரவு 10.00 மணிக்குத் தெரிவித்திருந்தார். இதனைத் தொடர்ந்து நோர்வே வெளிவிவகார அமைச்சினால் எமது நேரப்படி புதன்கிழமை நள்ளிரவு 12.30 மணியளவில் ஊடக அறிக்கை ஒன்று விடப்பட்டிருந்தது. இதில் குறிப்பிடப்பட்டிருந்த முக்கிய விடயங்களாக,

'2002 ஆம் ஆண்டு மேற்கொள்ளப்பட்ட போர்நிறுத்த உடன்படிக்கையில் இருந்து சிறிலங்கா அரசானது விலகிக்கொள்வதாக அறிவித்தமை தொடர்பாக நோர்வே தனது கவலையினைத் தெரிவித்துக் கொள்கின்றது' என்ற தலைப்புடன் வெளிவந்துள்ள இந்த ஊடகக் குறிப்பிலே எரிக் சொல்கெய்ம் தெரிவித்த கருத்துக்களானது,

'சிறிலங்கா அரசாங்கம் இந்த பாரதூரமான முடிவினை எடுத்ததையிட்டு நான் மிகுந்த கவலையடைகின்றேன். இந்த முடிவானது இரண்டு தரப்பினராலும் தொடர்ச்சியாக மிகவும் கொடூரமான முறையில் வன்முறைகள் மேற்கொள்ளப்படுகின்ற சூழ்நிலையில் எடுக்கப்பட்டிருக்கின்றது. இதன் விளைவாக வன்முறையும் பகைமையும் மேலும் தீவிரமாக அதிகரிக்கப்போகின்றது என்பதையிட்டு நான் ஆழ்ந்த கரிசனை கொண்டுள்ளேன். அத்துடன் பொதுமக்களின் உயிர்களைப் பாதுகாப்பது தொடர்பில் இது மோசமான விளைவுகளை ஏற்படுத்தும்' என்று எரிக் தெரிவித்துள்ளார்.

'2000 ஆம் ஆண்டில் அப்போதைய சிறிலங்கா சனாதிபதியாக இருந்த சந்திரிகா குமாரதுங்கவினாலும் விடுதலைப் புலிகளினாலும் உத்தியோகப+ர்வமாக விடுக்கப்பட்ட அழைப்பை ஏற்றே நோர்வே சமாதான முயற்சிகளுக்கு அனுசரணையாளராகச் செயற்படுவதற்குச் சம்மதித்தது. இந்த அழைப்பானது அண்மையில் 2006 ஒக்ரோபர் மாதம் சனாதிபதி மகிந்த ராஜபக்சவினால் புதுப்பிக்கப்பட்டது. ~தற்போது சிறிலங்கா அரசாங்கத்தினால் ஒரு தலைப்பட்சமாக மேற்கொள்ளப்பட்ட முடிவு காரணமாகச் சிறிலங்கா போர் நிறுத்தக் கண்காணிப்புக்குழுவே நேரடியாக பாதிப்படையப்போகின்றது. ஏனெனில் இந்தக் கண்காணிப்புக் குழுவினது செயற்பாட்டிற்கான ஆணையானது இந்த உடன்படிக்கையில் இருந்தே பெறப்படுகின்றது.' என்று அந்த ஊடகக் குறிப்பிலே மேலும் தெரிவிக்கப்பட்டுள்ளது.

நோர்வேத் தரப்பினர் சிறிலங்கா அரசாங்கத்தின் இந்த முடிவினால் மிகுந்த ஏமாற்றமும் கவலையும் அடைந்துள்ளதுடன் இலங்கைத் தீவின் எதிர்காலச் சமாதான முயற்சிகள் மற்றும் போர்நிறுத்த கண்காணிப்புக் குழுவின் எதிர்காலம் எவ்வாறு இருக்கப் போகின்றது என்பது தொடர்பாகக் குழப்பமும் அடைந்துள்ளார்கள். வருகின்ற வாரத்திலே நோர்வே அனுசரணையாளர்கள் இணைத் தலைமை நாடுகளான அமெரிக்கா, ஐரோப்பிய ஒன்றியம் மற்றும் யப்பான் ஆகிய நாடுகளுடன் ஒரு செய்மதித் தொலைத்தொடர்பு மாநாடு நடாத்தவுள்ளார்கள். அதிலே இந்த விடயம் தொடர்பாகத் தீவிரமாக ஆராயவுள்ளதாக நம்பத்தகுந்த வட்டாரங்களில் இருந்து தகவல்கள் தெரிவிக்கின்றன. அத்துடன் நோர்வேயின் விசேட தூதுவர் ஜோன் கான்சன் பௌயர் இந்தியாவிற்கு பயணம் மேற்கொண்டு இது தொடர்பாக கலந்துரையாடவுள்ளார். அத்துடன் கொழும்பில் உள்ள நோர்வேத் தூதுவர் பல்வேறு வெளிநாட்டுத் தூதுவர்களுடனும் இராஜதந்திரிகளுடனும் இலங்கைத்தீவின் எதிர்கால சமாதான முயற்சிகள் தொடர்பாகக் கலந்துரையாடவுள்ளார்.

கடந்த சனிக்கிழமையும் ஞாயிற்றுக்கிழமையும் சிறிலங்காவின் பாதுகாப்புச் செயலாளரும், சனாதிபதி மகிந்தவின் சகோதரருமான கோத்தபாய ராஜபக்ச போர் நிறுத்த உடன்பாட்டில் இருந்து விலகுவது தொடர்பாகவும் விடுதலைப் புலிகளைத் தடை செய்வது தொடர்பாகவும் பத்திரிகைகளுக்கு செவ்விகள் அளித்திருந்தார். எனவே நோர்வே எவ்வகையான இராஜதந்திர நடவடிக்கைகளை மேற்கொண்டாலும் சிறிலங்கா அரசாங்கமானது போர்நிறுத்த உடன்படிக்கையில் இருந்து விலகியதில் இருந்து பின்வாங்கமாட்டாது. அத்துடன் விடுதலைப் புலிகளைத் தடைசெய்வதே அதனது அடுத்த நடவடிக்கையாக இருக்கும். ஏனெனில் இப்போது மகிந்த அரசாங்கமானது தனது ஆட்சியைத் தக்கவைப்பதற்கு ஜே.வி.பி.யின் ஆதரவு அதற்குத் தேவைப்படுகின்றது. எனவே போரினைத் தீவிரப்படுத்துதல், நோர்வே அனுசரணையாளர்கள் மற்றும் கண்காணிப்புக் குழுவினரை வெளியேற்றுதல், சர்வதேசத் தொண்டர் நிறுவனங்கள் மீது அழுத்தங்களைப் போடுதல் என்ற ஜே.வி.பி.யின் நிபந்தனைகளுக்கு மகிந்த அரசானது உடனடியாகவே செவிசாய்த்து அதனை மேற்கொள்வதற்கு பின்நிற்காது. அத்துடன் மகிந்த ராஜபக்சவிற்கும் இவை அனைத்தும் பிடித்தமான நடவடிக்கைகள்தான் என்பதையும் நாம் மறந்துவிடக் கூடாது. எனவே ~எனது முதுகை நீ சொறி, நான் உனது முதுகை சொறிகிறேன்| நடவடிக்கைகளை இனிவரும் காலங்களில் நாம் அனைவரும் கண்டுகளிக்கலாம்.

புத்தாண்டு 2008

புத்தாண்டு 2008 தொடங்கியதில் இருந்து இப்பத்தி எழுதப்படும் வரை இலங்கைத் தீவில் இடம்பெறும் சம்பவங்கள் இந்த ஆண்டு எவ்வாறு இருக்கப்போகின்றது என்பதனைக் கட்டியங்கூறி நிற்கின்றன.

புத்தாண்டு தினத்தினைக் கொண்டாடுவதற்காக கொழும்பு கொட்டாஞ்சேனையில் அமைந்துள்ள பொன்னம்பலவாணேஸ்வரர் ஆலயத்திற்கு குடும்பத்துடன் சென்றவேளையில் காலை 9.55 மணிக்கு ஈ.பி.டி.பி துரோகக் கும்பலைச் சேர்ந்த ஒருவரால் ஐ.தே.க. நாடாளுமன்ற உறுப்பினர் தியாகராஜா மகேஸ்வரன் சுட்டுக்கொல்லப்பட்டார்.

கடந்த புதன்கிழமை சிறிலங்காப் படையினரை ஏற்றிச்சென்ற சொகுசு பேரூந்தானது கொழும்பு நகரிலே கிளைமோர்த் தாக்குதலுக்கு உள்ளானதில் இரண்டு படையினர் உட்பட ஐந்து பேர் கொல்லப்பட்டும் 28 பேர் காயங்களுக்கும் உள்ளானார்கள்.

இது தவிர விடுதலைப் புலிகளின் கட்டுப்பாட்டுப் பிரதேசங்களின் மீது சிறிலங்கா விமானப்படையினர் தொடர்ச்சியாக குண்டுகளை வீசி பொதுமக்களுக்கு உயிரிழப்புக்களையும் சொத்தழிவுகளையும் ஏற்படுத்தி வருகின்றார்கள்.

வன்னியின் மேற்குப் பிராந்தியத்தில் மன்னார்-வவுனியா, வடபோரரங்கில் கிளாலி-முகமாலை-நாகர்கோவில் மற்றும் வன்னி கிழக்குப் பிராந்தியத்தில் மணலாறு ஆகிய இடங்களில் தொடர்ச்சியாகச் சமர்கள் இடம்பெற்று வருகின்றன.

சிறிலங்கா சனாதிபதியும் சிங்களப் படைத்தளபதிகளும் விடுதலைப் புலிகளுக்கு எதிரான போரானது மிகவிரைவில் முடிவிற்கு கொண்டுவரப்படும் என்று சிங்கள மக்களுக்கு பரப்புரை செய்தபடி போருக்காகப் பல்லாயிரம் கோடி ரூபாய்களை செலவழித்துக் கடுமையான இன அழிப்புப் போரினை தமிழ் மக்கள் மீது கட்டவிழ்த்து விட்டுள்ளார்கள். கடந்த டிசம்பர் 26 ஆம் திகதி மாத்தறையில் உரையாற்றிய சனாதிபதி மகிந்த விடுதலைப் புலிகள் மிக விரைவில் முற்றுமுழுதாக அழிக்கப்படுவார்கள் என்று தெரிவித்தார்.

அமெரிக்க முன்னாள் சனாதிபதிகள் ஜோன் கென்னடி மற்றும் லின்டன் ஜோன்சன் ஆகியோர்கள் வியட்நாம் போரின் போதும், ரஷ்யர்கள் ஆப்கானிஸ்தானில் முகாஜீதீன்களுக்கு எதிராகப் போரிட்டபோதும் இவ்வாறே தெரிவித்தார்கள். ஆனால் இறுதியில் யார் வென்றார்கள் என்பதை வரலாறு தெளிவாகவே பதிந்து வைத்திருக்கின்றது. ஏன் 1997 இல் சிறிலங்காவின் அப்போதைய சனாதிபதியாக இருந்த சந்திரிகாவும் அவரது பாதுகாப்பு அமைச்சரும் மாமனாருமான ஜெனரல் அநுருத்த ரத்வத்தவும் யாழ். குடாநாட்டை கைப்பற்றிப் பின்னர் வன்னியிலே ஜெயசிக்குறு நடவடிக்கையினை மேற்கொண்டிருந்த வேளையில் ரத்வத்த பீற்றிக்கொண்டதாவது, 1998 பெப்ரவரி மாதம் சிறிலங்காவின் 50 ஆவது ஆண்டு சுதந்திர விழாவினைக் கொண்டாடும்போது நான் வன்னியை முழுமையாகக் கைப்பற்றி தேசியத்தலைவருடன் கை குலுக்குவேன் என்று தெரிவித்திருந்தார். இப்போது மகிந்த ராஜபக்ச குடும்பத்தினர் இவ்வாறு அலட்டத் தொடங்கியிருக்கிறார்கள்.

வியட்நாம் போர் முடிவடைந்து பல வருடங்களின் பின்னர் போரிலே கொல்லப்பட்ட வீரர்களை நினைவுகூருவதற்காக அமெரிக்க மற்றும் வட வியட்நாம் தளபதிகள் ஒன்றாக நின்றிருந்த வேளை ஒரு அமெரிக்கப்படைத் தளபதி வியட்நாம் தளபதியைப் பார்;த்து ~நீங்கள் நடாத்திய எந்த ஒரு சமரிலுமே உங்களால் எங்களைத் தோற்கடிக்க முடியவில்லையே| என்று கூறியபோது அந்த வியட்நாமியத் தளபதி கூறியதாவது ~உண்மைதான். ஆனால் நாங்கள் ஒட்டுமொத்தமான வியட்நாமிய விடுதலைப் போரிலே வெற்றிபெற்று விட்டோமே. அதுதான் முக்கியம்.| என்று அமைதியாகத் தெரிவித்தார். இதனை மகிந்தவின் சகோதரர்களும் அவரது படைத்தளபதிகளும் புரிந்துகொள்வது நல்லது.

"அர்த்தமற்ற உடன்படிக்கை குறித்து ஏன் இந்த ஆரவாரம்?"

2002 பெப்ரவரியில் நோர்வேயின் அனுசரணையுடன் அன்றைய பிரதமர் ரணில் விக்கிரமசிங்கவும் விடுதலை புலிகளின் தலைவர் வேலுப்பிள்ளை பிரபாகரனும் கைச்சாத்திட்ட போர் நிறுத்த உடன்படிக்கையில் இருந்து விலகுவதற்கு ஜனாதிபதி மகிந்த ராஜபக்ஷவின் அரசாங்கம் தீர்மானித்திருக்கிறது. நேற்று முன்தினம் புதன்கிழமை இதுதொடர்பாக அமைச்சரவை மேற்கொண்ட தீர்மானத்தின் பிரகாரம் வெளியுறவு அமைச்சர் ரோஹித போகொல்லாகம கொழும்பில் உள்ளவெளிநாட்டு தூதுவர்களுக்கு நேற்று விளக்கமளித்திருக்கிறார். போர் நிறுத்த உடன்படிக்கையில் சம்பந்தப்பட்ட தரப்பினர் அதிலிருந்து விலகுவதாக இருந்தால் நோர்வே அரசாங்கத்துக்கு 14 நாட்கள் முன்னறிவித்தல் கொடுக்க வேண்டும். அந்த முன்னறிவித்தல் கடிதத்தை வெளியுறவு அமைச்சர் நேற்று மாலை இலங்கைக்கான நோர்வே தூதுவரிடம் கையளித்திருக்கிறார்.
நோர்வேயின் அனுசரணையுடனான சமாதான முயற்சிகளின் ஒரேயொரு விளைபயன் என்று ஒரு கட்டத்தில் இந்தப் போர் நிறுத்த உடன்படிக்கை வர்ணிக்கப்பட்டதுண்டு. ரணில் விக்கிரமசிங்க தலைமையிலான ஐக்கிய தேசிய முன்னணி அரசாங்கத்துடனான பேச்சுவார்த்தைகளில் இருந்து 2003 ஏப்ரிலில் விடுதலை புலிகள் விலகியபோதிலும் கூட, போர் நிறுத்த உடன்படிக்கையில் இருந்து விலகுவதற்கு அவர்கள் ஒருபோதுமே தயாராக இருந்ததில்லை. 2006 நவம்பர் மாவீரர்தின உரையில் தான் பிரபாகரன் போர்நிறுத்த உடன்படிக்கை செயலிழந்து விட்டது என்று கூறியிருந்தார். சமாதான முயற்சிகளுக்கு எதிரான ஜனதா விமுக்தி பெரமுனை (ஜே.வி.பி.) மற்றும் ஜாதிக ஹெல உறுமய போன்ற பேரினவாத சக்திகளை அரவணைத்துக் கொண்டு 2005 நவம்பர் ஜனாதிபதித் தேர்தலில் போட்டியிட்ட மகிந்த ராஜபக்ஷ போர் நிறுத்த உடன்படிக்கையில் மாற்றங்களைச் செய்வதாகவும் நோர்வேயின் அனுசரணையைக் கைவிடுவதாகவும் நாட்டு மக்களுக்கு உறுதியளித்தார். அதிகாரத்துக்கு வந்து இருவருடங்களுக்கும் கூடுதலான காலம் கடந்துவிட்டபோதிலும், ஜனாதிபதி ராஜக்ஷ போர்நிறுத்த உடன் படிக்கையில் இருந்து விலகுவதற்கு பெரிதாக அக்கறை காட்டவில்லை. இதற்கு சர்வதேச சமூகத்தின் நெருக்குதல்களே பெருமளவுக்குக் காரணமாக இருந்ததென்று நம்பப்பட்டது.

தற்போதைய சந்தர்ப்பத்தில் ஜனாதிபதி ராஜபக்ஷவின் அரசாங்கம் போர்நிறுத்த உடன்படிக்கையில் இருந்து விலகுவதற்கு தீர்மானித்ததன் பின்னணி என்ன? கடந்த சில வருடங்களாக குறிப்பாக இருவருடங்களாக போர் நிறுத்த உடன்படிக்கை என்று ஒன்று இலங்கையில் நடைமுறையில் இருந்தது என்று எவராவது கூறுவாரானால், உண்மையில் அவர் சித்தப்பிரமை பிடித்தவராகத்தான் இருக்கமுடியும். மக்கள் முற்றுமுழுதான போரையொத்த சூழ்நிலையிலேயே அவலப்பட்டுக் கொண்டிருக்கிறார்கள். போர் நிறுத்த உடன்படிக்கை சீர்குலைந்து இலங்கையில் மோதல்கள் மீண்டும் தீவிரமடைவதை சர்வதே சமூகத்தினால் தடுத்து நிறுத்த முடியவில்லை. கடந்த சில மாதங்களாக மோதல்கள் உக்கிரமடைந்த வேளையிலும் போர் நிறுத்த உடன்படிக்கை குறித்து ஜனாதிபதி ராஜபக்ஷ எதையுமே பேசவில்லை. கடந்த வருட நடுப்பகுதியில் செய்தியாளர்களுடனான சந்திப்பின் போது போர்நிறுத்த உடன்படிக்கை குறித்து கேட்கப்பட்ட கேள்வியொன்றுக்கு பதிலளித்த ஜனாதிபதி ராஜபக்ஷ, `அரசாங்கம் தற்போது மேற்கொள்கின்ற படை நடவடிக்கைகளுக்கு அந்த உடன்படிக்கை எந்தவிதத்திலும் தடையாக இல்லை' என்று தான் கூறியிருந்தார்.

ஆனால், கடந்த சில வாரங்களாக விடுதலைப் புலிகளை தடை செய்வது குறித்தும் போர் நிறுத்த உடன்படிக்கையில் இருந்து விலகுவது குறித்தும் அவரும் அவரது சகோதரரான பாதுகாப்புச் செயலாளர் கோதாபய ராஜபக்ஷவும் முழு முச்சாகப் பேசியதைக் காணக் கூடியதாக இருந்தது. இதனிடையே ஜே.வி.பி. போன்ற பேரினவாதச் சக்திகளும் உடன்படிக்கையிலிருந்து அரசாங்கம் விலகி வன்னி மீது முற்று முழுதான போரைத் தொடுக்க வேண்டுமென்ற கோரிக்கையைத் தீவிரப்படுத்த ஆரம்பித்தன. அரசாங்கமும் வடபகுதி மீதான போருக்கு தயாராகிக் கொண்டிருக்கிறது. உண்மையில் அர்த்தமற்றதாகிப் போய்விட்ட ஒரு உடன்படிக்கை தொடர்பில் ஏன் இந்த ஆரவாரம்? முற்றுமுழுதான போருக்கு சர்வதேச சமூகமும் அரசாங்கத்திற்கு பச்சைக் கொடி காட்டி விட்டதா?

thinakkural.com

இனப் பாகுபாட்டுக் கொடூரம் இன்னும் தீவிரமாகும் சூழல்

இலங்கை அரசுக்கும் தமிழீழ விடுதலைப் புலிகளுக்கும் இடையில் 2002 பெப்ரவரி 22 ஆம் திகதி கைச்சாத்தான யுத்த நிறுத்த ஒப்பந்தத்துக்கு சட்ட ரீதியான சாவு உறுதியாகிவிட்டது. இந்த ஒப்பந்தத்திலிருந்து விலகுவது பற்றிய இலங்கை அரசின் தீர்மானம் உத்தியோகபூர்வமாக அனுசரணைத் தரப்பான நோர்வேக்கு அறிவிக்கப்பட்டதும், பதினான்கு நாட்களில் நடைமுறைக்கு வரக்கூடியதாக யுத்த நிறுத்த ஒப்பந்தத்திற்கான மரணச்சான்றிதழ் எழுதப்பட்டுவிடும்.
இலங்கை அரசின் இந்த முடிவின் காரணமாக, இதுவரை செத்துச் செயலிழந்து, சேடம் இழுத்துக்கொண்டிருந்த யுத்த நிறுத்த ஒப்பந்தத்தின் பிராணன் நிரந்தரமாக வெளியேறப் போகிறது. அதுமட்டுமல்ல.

யுத்த நிறுத்தக் கண்காணிப்புக் குழுவும் தனது ஐந்தரை வருடப் பணியை முடித்துக்கொண்டு மூடை முடிச்சுகளைக் கட்டிக் கொண்டு வெளியேற வேண்டியதுதான்.
இதுவரை அனுசரணைப் பணியாற்றிய நோர்வேக்கும் இனி அந்த வேலை நிலுவையில் நிற்கப் போவதில்லை. அதுவும் முடிந்தமாதிரித்தான்.

இந்த அனுசரணைப்பணிக்கு 2000 ஆம் ஆண்டில் அப்போதைய இலங்கை ஜனாதிபதி சந்திரிகா குமாரதுங்கவினால் நோர்வே உத்தியோகபூர்வமாக அழைக்கப்பட்டது.

2005 நவம்பரில் அவரின் அதிகார காலம் முடிவுற்றது. நோர்வேயையும் அதன் அனுசரணைப் பணியையும் கடுமையாக விமர்சித்துத் தூற்றிவந்த பௌத்த சிங்களப் பேரினவாத சக்திகளின் பின்புல ஆதரவோடு மஹிந்த ராஜபக்ஷ அரசுத் தலைவரானார். அவரை ஆட்சிப் பீடத்துக்கு முன்தள்ளிக் கொண்டு வந்த பேரினவாத சக்திகள் நோர்வேயின் பங்களிப்பை கடுமையாக எதிர்த்து வந்ததால் நோர்வேயின் அனுசரணைப்பணி மீண்டும் இடம்பெறுவதற்கு வாய்ப்பேயில்லை என அப்போது கருதப்பட்டது.

ஆனால் புதிய அரசுத் தலைவர் மஹிந்தவும் 2006 ஜனவரியில் நோர்வேயை அனுசரணைப் பணிக்கு மீண்டும் அழைத்ததால் நோர்வே மீண்டும் தனது நகர்வுகளை முன்னெடுத்தது.
எனினும், அது கூட நீண்ட காலம் நீடிக்கவில்லை.
மஹிந்தரின் புதிய அரசுக்கும் விடுதலைப் புலிகளுக்கும் இடையில் ஜெனிவாவில் இடம்பெற்ற இரண்டாம் சுற்றுப் பேச்சுகள் 2006 ஒக்டோபரில் முன்னேற்றமின்றி, முட்டுக்கட்டையில் முடிவடைந்ததை அடுத்து, நோர்வேயும் தன்பாட்டில் தனது அனுசரணைப் பணியை இடைநிறுத்த வேண்டியதாயிற்று.

பிணக்கில் சம்பந்தப்பட்டுள்ள இரு தரப்பினரான இலங்கை அரசும், விடுதலைப் புலிகளும் மீண்டும் கேட்டாலன்றி புதிய அமைதி எத்தனங்கள் எதிலும் ஈடுபடுவதில்லை என நோர்வே அப்போதே தீர்மானித்து அறிவித்திருந்தது.

மீண்டும் அத்தகைய அழைப்பு ஏதும் வராத நிலையிலேயே, இப்போது யுத்த நிறுத்த ஒப்பந்தமே முடிவுக்குக் கொண்டுவரப்படுவதால், இனி அனுசரணைப் பணிக்கு வாய்ப்போ தேவையோ இல்லை என்றாகி விட்டது.

கடந்த வரவு செலவுத் திட்ட சமயத்தில் ஆட்சி கவிழும் ஆபத்தை எதிர் நோக்கிய மஹிந்த அரசு, கடைசி நேரத்தில் பௌத்த சிங்களத் தீவிரப் போக்கும் பேரினவாதத் திமிரும் கொண்ட ஜே.வி.பியின் காலில் விழுந்து, அதைத் தாஜா செய்து, அக்கட்சியின் தயவில் கடைக்கண் பார்வையில் தப்பிப்பிழைக்க வேண்டிய கட்டாயத்துக்குள்ளானது. ஜே.வி.பியிடம் அந்த உதவியைப் பெறுவதற்காக அரசுத் தலைமை சில வாக்குறுதிகளை அதற்கு வழங்கியது என்றும், அவற்றைப் புத்தாண்டில் நடைமுறைப்படுத்த அரசு ஜே.வி.பிக்கு உறுதி தந்தது என்றும் இப்பத்தியில் ஏற்கனவே விளக்கமாக விவரமாக குறிப்பிட்டிருந்தோம்.

அத்திட்டப்படியே எல்லாம் நடக்கின்றன; விடயங்கள் கட்டவிழ்கின்றன.
அந்த வாக்குறுதிப்படி புத்தாண்டு பிறந்ததும் யுத்த நிறுத்த ஒப்பந்தத்திலிருந்து விலகுவது பற்றிய அறிவிப்பை இலங்கை அரசு விடுத்திருக்கின்றது.

இரண்டு வார முன்னறிவித்தல் காலம் கடந்ததும் யுத்த நிறுத்த ஒப்பந்தம் உத்தியோகபூர்வமாக செத்ததும் ஏற்கனவே ஜே.வி.பிக்குத்தான் கொடுத்த மற்றொரு வாக்குறுதிப்படி, புலிகள் இயக்கம் மீது இலங்கையிலும் தடை விதிக்கும் அறிவிப்பை அரசு விடுக்கும்.
அதன் பின்னர் அடுத்த வாக்குறுதிப்படி இலங்கை நாட்டின் இறைமையைப் பேணும் விதத்தில் காத்திரமான நடவடிக்கை எடுத்தல் என்ற பெயரில் தமிழர் தேசம் மீது முழு அளவில் ஒரு கோர யுத்தத்தை அது கட்டவிழ்த்துவிடும்.

இவை எதிர்பார்க்கப்பட்ட விடயங்களே.

ஆனாலும் மஹிந்த அரசின் இந்த உத்தேச நிகழ்ச்சி நிரல் யுத்தத் தீவிரப் போக்குச் செயற்பாடு இதுவரை அரசுக்கு வெளியே நின்று அரசுத் தலைமைக்கு அவ்வப்போது தொல்லை மற்றும் தொந்தரவு கொடுத்து வந்த ஜே.வி.பியை மீண்டும் அரசுத் தரப்புக் கூட்டணிக்குள் கூட்டி வந்து சேர்ப்பதற்கு வழி செய்தாலும் செய்யலாம் என்பதே நிலை.
ஆகவே, யுத்த நிறுத்த ஒப்பந்தத்தை ரத்துச் செய்யும் ஜனாதிபதி மஹிந்த ராஜபக்ஷ தலைமையிலான அரசின் இந்தத் தீர்மானம், பௌத்த சிங்களப் பேரினவாதச் சிந்தனையில் மூழ்கிக் கிடக்கும் தீவிரவாதிகளை அவரின் பின்னால் மீண்டும் ஐக்கியப்பட்டு அணி திரளச் செய்யப் போகின்றது.

இதன் விளைவு, சிறுபான்மை இனத்தவருக்கு எதிரான இனப்பாகுபாட்டுக் கொடூரம் இலங்கைத் தீவில் இன்னும் தீவிரம் பெறவே வழிசெய்யும் என்பது நிச்சயம்.

Uthayan.com